غادة حجاج تكتب: الترند مقابل الكرامة !!
ياجماعة انا في اندهاش واستغراب كبير 🤔 فيه موضوع مهم جدا كنت عايزة اتكلم فيه واقول وجهة نظري
الحقيقة إني بستغرب من الناس اللي بتكون مستعدة تهين نفسها… تذل كرامتها وتضحك على ذاتها عشان توصل لتريند أو شهرة
يعني إيه الكلام ده؟ إزاي شخص يرضى يبيع احترامه لذاته واحترام الناس له وكرامته مقابل لايكات ومشاهدات؟!!! فهموني بتعملوها ازاي ..طب شايفين نفسكوا ازاي ؟!!! بأي عين بتبصوا ف المرايه علي نفسكوا لما احترامكوا لنفسكوا يروح
بتكون بتضحك على نفسك وتضحك الناس عليك وعلي فشلك وعلي طريقتك الركيكة في الفيديو وعايز تفتكر إن ده هيخلي الناس تحترمك؟!!!
بتكون بتقول أو تعمل حاجات مهينة وعايز تفتكر إن ده نجاح؟!! بالعكس ده فشل ذريع و احراج وكسفة للاسف المفروض تخجل من نفسك…مش تتباهي !!
بتكون مستعد تتنازل عن كل مبادئك عشان يبقى ليك اسم في السوشيال ميديا؟!!!
الموضوع جداً محزن.. ربنا كرمنا وقال: “وَلَقَدْ كَرَّمْنَا بَنِي آدَمَ”
وأنا بوجه سؤالي لناس كتير: ليه بتستسلموا وتتهاونوا في الكرامة دي؟!! ليه هاين عليكوا نفسكوا بالشكل ده!!!
الشهرة زائلة والتريند هيعدي ومحدش هيفتكر غير الإهانة اللي عملتوها لنفسكوا ووافقتوا عليها
خلي عندكم عزة نفس .. خليكوا محترمين.. خليكوا أهل للكرامة اللي ربنا منحكم إياها.
اللي بيحترم نفسه الناس كلها بتحترمه واللي بيبيع كرامته بيخسر نفسه وخسران دنيا وآخرة…..
كرامتك أغلى من مليون مشاهدة.. احميها….
ارتقوا فالقاع ازدحم
استقيموا يرحمكم الله
