«أنا أستاهل».. محمد رمضان يفاجئ جمهوره بفيديو عن «واقعة صفع شاب»
«أنا أستاهل».. محمد رمضان يفاجئ جمهوره بفيديو عن «واقعة صفع شاب»
كشف الفنان المصري محمد رمضان في فيديو عبر حسابه على موقع “فيسبوك”، تفاصيل حادثة صفعه لشاب في مراسي، مع تقديم اعتذاره لأسرة الشاب.
وقال محمد رمضان في الفيديو: “أشكر جمهوري الأصيل الغالي، وربنا ما يحرمنيش منكم على وقفتكم معي ودعمكم. قرأت وسمعت دفاعكم عني وانتقادكم للولد الصغير، لكن أنا عملت الفيديو ده لأعترف بخطأي وأعتذر لأهل الولد الصغير، لأن إيدي اتمدت عليه وأنا عارف إنه عيل صغير”.
وأضاف محمد رمضان: “لما غلط في الأول، قلعته الكاب وبصيت في وشه، لقيت إنه صغير وسألته عن اسمه، ولما رجع غلط تاني، طلبت منه الهاتف، فخباه، وما تملكتش نفسي وضربته قلم بسيط، والقلم ده طير له الكاب والنضارة. لو نعتبر أن الناموسة اللي وقفت على خدي قلم، فأنا أستاهل 5 لأني مديت إيدي على عيل صغير وده لا رجولة ولا بطولة”.
وتابع: “أنا ما تمالكتش نفسي لما خدت تليفونه ومسحت الفيديو. حد قال لي اكسر له تليفونه علشان ما يعملش كده تاني، قلت له لو هو غلط، أبوه وأمه ذنبهم إيه يجيبوا له تليفون تاني، خاصة لما عرفت إنه من قرية تانية، وقلت لهم روّحوه، والأمن قال اعمل له محضر، قلت لهم لأ يروّح بعد إذنكم”.
وفي وقت سابق، ضجت مواقع التواصل الاجتماعي بفيديو للفنان محمد رمضان وهو يصفع معجباً، مما دفع الشاب لرد الصفعة في اللحظة ذاتها، وذلك خلال تجول محمد رمضان في قرية مراسي بالساحل الشمالي بعد إحيائه حفلاً هناك.
وأظهر الفيديو محمد رمضان في حالة غضب، وهو يثور على شاب ويطلب منه الهاتف الخاص به، حيث كان يريد محمد رمضان حذف الفيديو الذي التقطه الشاب، والذي سخر فيه من محمد رمضان قائلاً “الفنان محمد حمضان”. وعندما رفض الشاب إعطاء رمضان الهاتف، قام بصفعه، ليرد المعجب الصفعة تجاه الفنان. تدخل أفراد مكتب الأمن المتواجد لفض الاشتباك بينهما في لحظتها.
وقد سبق أن كشف الشاب كريم شلبي، صاحب الواقعة، تفاصيل ما حدث.
وقال في تصريحات لمواقع محلية: “لما شفت محمد رمضان كنت حابب أهزر معاه وقلت له يا محمد حمضان، لاقيته خد الكاب بتاعي وسألني عن اسمي؟ رجعت تاني وطلعت موبايلي علشان أصور معاه فيديو من باب الهزار وأنا بقول محمد حمضان، وتفاجأت أنه عايز يمسك الموبايل وضربني بالقلم. قمت ضربه في نفس اللحظة، مكنتش خائف أضرب محمد رمضان بالقلم علشان كنت لازم آخد حقي”.
