ازاى تواجه “قرش”في المياة ويخاف منك ويجري .. نصائح
بمناسبه الهري علي حادث الغردقه ، أي حد، تلاقيه كاتب بوست مطلعه تنويع على:
“القروش مبتحبش طعم البشر/ مبتهاجمش البشر/ بتفتكر البشر كائن تاني/ مفيش قرش بيهاجم بني آدم / قرش مسعور”.
اعمله بلوك.
ده إنسان متخلف.
١ – القروش بتندرج تحت مستوى “المفترس ألفا Apex predator”.
زي الذئاب والدببة والتماسيح والأسود والخ.
بالنسبة للمفترس ألفا، أي حاجة بتدخل إقليمه هي وجبة محتملة.
حتى لو من خارج بيئته وعالمه.
– عشان كده الذئاب والأسود والدببة والقروش بتهاجم وتفترس البشر، لو جتلها فرصة.
وعلشان كده بنلاقي في امعاء القروش قطع معدنية ونمر عربيات وبنلاقي أسنان القرش مغروسة في قيعان القوارب. القارب بالنسبة له مجرد شيء، ممكن ان يكون طعاما.
– مبتجيبش للمفترس ألفا، الأسد مثلا، كنجارو من قارة تانية مشافوش في حياته، فيقولك “لأ انا مش متعود عليه ومبحبوش.. عايز غزلان.”…!!
٢ – الدببة والقروش بتشترك في انها صيادين انتهازية opportunistic hunters. المتاح بياكله وبيفضل بالذات لو كان فريسة سهلة.
عشان كده تحت البحر لما بنوكز القرش برمح او خنجر أو ندفعه بعنف، تلقائيا بيفهم ان دي فريسة حتاخد مجهود، فبيسيب الغواص وينصرف لوجبة اخرى.
– وعشان كده بيعلموك برا لو قابلتك دببة انك تصرخ وتعمل دوشة وتبدو اضخم.
كده انت فريسة مزعجة حتاخد مجهود، دا مبيفضلوش الصياد الانتهازي.
او بتشعر ان انت مفترس ألفا بدورك.
المفترسات ألفا بتعمل ألف حساب لبعضها البعض.. الجرح في البرية او تحت البحر ثمنه فادح.
٣ – مفيش حاجة اسمها “القروش ببدلة الغوص السودا بتفتكرك كلب البحر”.
لو القرش دا مشافش كلب بحر في حياته بيفتكرني ايه طيب؟
حكم كورة؟؟
ولو بدلة الغوص مموهة وللا ملونة بيفتكرني ايه؟
– بدلة الغوص سوداء لانه بالعكس، بتخلي المفترسات في البحر متشوفكش كويس!
٤ – بالنسبة للقروش والمفترس ألفا عامة، اللحم لحم. عشان كده القروش بتفتك بالجثث الغارقة. دا من ادوارها في الطبيعة. تنضف البيئة من الجثث.
اي جثث.
٥ – نبهت قبل كده مرارا، متنزلش للسباحة ولا الغوص منفردا، ولا في منطقة قوارب وسفن، ولا في مكان متعرفوش ولا في مكان مش شايف فيه الاعماق تحتك.
متلبسش حلى ولا مجوهرات ولا تحط برفان ولا مزيل عرق قبل النزول. مترميش بواقي اكل في الميه ومتنزلش وانت بتنزف ولو نزف طفيف، ومتستعملش البحر كمرحاض وتملاه بول. القروش بتشم البول زي الدم. من مسافات مش حتعرف تتخيلها.
– نضارة السباحة وانت بتعوم مهمة جدا.
– لو حسيت بموجة رفعتك من اسفل بغتة.. اخرج من المياه.
٦ – الفندق او المنتجع اللي يلاقي سباح نازل في منطقة غير مطروقة، لازم ينبهه. ولازم يوزع كتيب بمخاطر دا. دا بيدعم السياحة مش بيقللها.. ويحسسه انك خايف على سلامته.
٧ – المفترس ألفا لما بيجرب البشر بيتحول لانتهازي مفترس مارق Rogue.. عن سلوك اقرانه.
خلاص اكتشف فريسة لذيذة وهشة ومعندهاش اجنحة ولا انياب ولا مخالب.. الإنسان.
بيستمريء لحمه ويعتاده ويدور عليه بالذات.
– القصة دي بتحصل مع الأسود والنمور العجوزة، اللي بتعجز عن مطاردة طرايدها العادية، وبتكتشف البشر.
التماسيح كذلك اللي بتصطاد البشر، لوحظ انها بتستمرئ العملية دي. في تمساح في بوروندي اسمه “جوستاف Gustav the crocodile of Burundi” قتل وافترس حوالي 300 بشري.
وهنا في حالتنا، يا تصطاد الحيوان، وتتخلص منه، ودا الاصح.. يا تخفى عنه شوية لحد ما يرجع لنظامه المعتاد.. ودا صعب.
مثلا القرش هضمه للوجبة قد يدوم ٣ – ٤ أيام. بيخوض خلالهم في المياه العميقة الباردة، لان عملية الهضم بترفع حرارته.
زي مانت بتحس بالدفء والحر بعد الأكل.
– بعد ما يهضم حيرجع لنفس البقعة يدور على ضحية سهلة جديدة. لازم ميلاقيهاش ويجوع.. يجوع لعشرة أو عشرين يوم.. فيضطر يبحث عن اي اكل.. فتصطاده.
بتقتنصه بالاقفاص والغواصين واسلحة ما تحت الماء. او تصطاده بخطاف وطعم يحبه. دا افضل حل، لانه ممكن يستنى حتى لو جاع.
في انواع بتقعد موسم كامل من غير اكل. ست أسابيع.
٨ – مفيش حاجة اسمها “القروش كيوت وانا بغوص معاها يا كماحة اهه”. دا منطق العبيط اللي بيحاول يبدو مخيف.
أنا غصت وسط اسماك القرش من مختلف الفصائل في ٧ دول بعدد شعر راسك، وكل مرة كنت بحس بالخوف، خصوصا مع القروش ليلا.. وكل مرة كنت مسلح ومستعد انها تبقى حياة السمكة قصاد حياتي.
مسكت ثعابين وعقارب حية وكنت خايف برضه. اللعبة هنا انك تسيطر على الخوف.. مش هو اللي يسبطر عليك.
– جو “انا مبخافش من الأسد” و”القرش مبيحبش طعمنا” الطفولي الساذج دا اعمله في السيرك. ماتكتبوش لناس حتصدقك وتعرضهم للخطر.
٩ – لو قابلك القرش متصابش بهلع. سيطر على خوفك وحافظ على اتصال النظرات عينا في عين.. ولو قربلك اوكزه بسلاح.. برمح. بزعنفتك.. امسكه من خياشيمه بغلظة، ادفعه بعيد دفعة قوية.. حسسه انك كذلك “مفترس ألفا” والهجوم عليك مغامرة وانك مش فريسة سهلة.
ساعتها حيسيبك كصياد انتهازي، لبديل اسهل.
١٠ – القروش معظمها مش لطيفة ومش حبوبة وبتحب لحمك وبتطور من أدائها عشان تصطادك بالذات.
قروش الماكو مثلا اتعلمت اننا كغواصين لما بنلبس بذلات غوص حديدية، فسيقاننا مبتبقاش مغطاه بالدروع.. وعشان كده.. قروش الماكو بتهاجم من النقطة دي بالذات.
بتهاجم سمكة ابو سيف من اسفل، عشان للسمكة مستعملش رمحها المخيف وتحمي نفسها. باختصار.. عبارة “انت ما تأكله” تنطبق حرفيا على قروش الماكو.
اسمها Predator-prey co-evolution. علاقة التطور المشتركة بين الفريسة والصياد.
جزء من نظرية التطور العامة، اللي الشيخ عبدالله اثبت انها سقطت في طلخا.
طبعا دا بعيد عن القروش المسالمة.. او النباتية.
١١ – مفيش حاجة اسمها قرش عنده سعار. السعار Rabies.. مبيصيبش غير الثدييات!
١٢ – القروش مبتعومش للخلف. فلو بتغوص وقابلت قرش في كهف او نفق ضيق او حطام، لازم توسع طريق يمر، والا واحد فيكم يموت. لو مفيش مكان كافي تبعد عن مساره، احرص ان يبقى معاك سلاح، وبع حياتك غالية. بشكل عام ماتعترضش اي مسار للقرش.
– في اجهزة طرد قروش shark repellents على شكل اسورة للمعصم او الكاحل.. بتعمل بنفس طريقة المغناطيس بس بالنبضات الكهربية، الجمارك عندنا بتمنعها لسبب مجهول. جايز عشان القروش ماتزعلش.
١٣ – قصة انك مطلع قرش من البحر وبتعذبه وتضربه بعتلة حديدية وتهشم أسنانه عشان “أكل الزبون” دي جديدة لانج.
هو ربنا خالقه بياكل اي حاجة، بما فيها الزبون.
وخالقك عشان تحذر الزبون وتخلي بالك منه.
لقطة زي دي لما تطلع برا.. وانت بتعذب سمكة صماء، معملتش حاجة غير انها كانت بتاكل.. حتخليهم يدركوا انك بذكاء صرصار البلاليع.
محدش حيأمن على نفسه في وجودك انت!!
فلقطة زي دي ممكن تخرب السياحة اكتر من حادثة القرش نفسها. حوادث هجمات القرش بتحصل في كل شواطيء الدنيا.. بس المخابيل اللي ماسكين عتلة حديدية قليلين.
١٤ – لو متعرفش.. متكتبش للناس وتعرضهم لاي خطر. اسكت. محدش حيحس بغيابك كخبير حياة بحرية.. صدقني
