3 اجراءات تهزم مافيا الدهب .. هبوط كبير للأسعار قريبا
إزاي الحكومة نجحت في وقف جنون الأسعار في سوق الدهب؟ وايه الاجراءات اللي تمت خلت سعر الجرام يهبط بحوالي 500 جنيه في سعر الجرام الواحد؟ وهل الفترة الجاية هتشهد مزيد من الهبوط ولا ممكن المعدن الأصفر يعمل ريمونتادا والأسعار ترجع ترفع تاني؟
من فترة والحكومة شغالة بقوة على ضبط سوق الدهب بعد الجنون اللى حصل ووصول سعر الجرام الى مستويات قياسية كانت قريبة من ال 3 الاف جنيه للجرام عيار 21 .. وكان فيه انزعاج كبير من التحركات والتلاعب اللي بيحصل فى واحدة من أهم السلع اللي بتشغل بال واهتمام المصريين خصوصا انها مرتبطة بتسعير الدولار وتجار الدهب كانوا مسعرين العملة الأمريكية بأعلى من سعرها فى البنوك وحتى فى السوق السوق بفارق كبير جدا وده اللى كان عامل الفوضى فى سوق الدهب
طب الحكومة عملت ايه عشان تقضي على التلاعب وتظبط السوق ؟
فيه كذا اجراء الحكومة خدتهم سمعوا فى سوق الدهب وخلوا الاسعار تنزل بصورة كبيرة جدا لدرجة ان سعر الجرام عيار 21 هبط بحوالى 500 جنيه مرة واحدة وبعد ما وصل فى اوقات الذروة الى 2850 جنيه بيتباع النهار ب 2380
ومن أهم الاجراءات اللى اعلنت عنها الحكومة السماح للمصريين المقيمين فى الخارج بادخال اى كميات من الدهب بدون جمارك ولا رسوم ودفع فقط قيمة ضريبة القيمة المضافة وده هيعمل رواج كبير فى سوق الدهب وهيزود المعروض لأن الكميات المتوقع دخولها هتكون كبيرة جدا خصوصا لو عرفنا ان فيه فرق سعر فى الدهب بره عن مصر بحوالى 900 جنيه فى الجرام الواحد يعنى حضرتك لو هتجيب 100 جرام دهب من بره مصر هتوفر حوالى 90 الف جنيه.
الاجراء التانى اللى كان ليه دور فى هزيمة مافيا الدهب كان اعلان اسعار الدهب على شاشات البورصة بشكل يومي ورغم ان ده هيكون سعر استرشادي لكن هيحرج تجار الصاغة ومش هما بس اللى هيكونوا متحكمين فى تحديد سعر الدهب فى مصر
الاجراء التالت كان الموافقة على تدشين اول صندوق استثمار فى الدهب ومن خلال الصندوق ده يقدر اى مواطن يشتري دهب بسعر عادل وكمان ما يقعش فريسة للنصب او شرا دهب مغشوش
طيب السؤال الأهم الدهب هيزيد ولا يقل الفترة الجاية؟
وفق قانون العرض والطلب اى سلعة المعروض بتاعها بيزيد سعرها بيقل وخد بالك ان كان فيه تلاعب اصلا فى سوق الصاغة والدهب كان مقيم بأعلى من سعره بكتير وعشان كده اللى بيحصل دلوقتي مجرد تصحيح لوضع غلط ومتوقع انخفاض تانى فى الاسعار مع بدء دخول الدهب من بره مصر.
