باسنت محمد تكتب: الإنسان غلبان

اه والله الإنسان ده أكتر مخلوق غلبان في كل المخلوقات . انت لو تعرف يا إنسان انت عايش إزاي وبتتعرض لإيه وكم التحديات اللي بتواجهك هيصعب عليك نفسك والله .

الإنسان هو المخلوق الوحيد اللي عليه تكليف . تكليف وحمل الرسالة وتعمير الأرض .. الإنسان اللي إمكانياته محدودة عليه تكليف مش علي باقي المخلوقات الخارقة القوة والتحمل .. ما هو احنا اللي إختارنا حمل الأمانة ولازم نبقي قدها ..
مش دي بقي المشكلة فلو علي قدر حمل الأمانة وتعمير الأرض وزرع الخير فيها تبقي سهلة ومقضية لكن المشكلة الحقيقية هي كم التحديات والعراقيل والمشاكل اللي بتواجهنا ..

انت عارف يا إنسان انك بتحارب شياطين الجن والإنس ونفسك الأمارة بالسوء وقرينك وفوق كل ده تجيلك بقي نفسك اللوامة تقضي عاللي باقي منك ؟!!
احنا بنحارب بجد في الدنيا دي وبنتحارب حروب غير متكافئة .. احنا امكانياتنا اضعف من ان تتحمل كل المعوقات دي .. لكن ..
تخيل بقي يا إنسان انك بتنتصر وتفوز وبتغلب كل اللي ذكرتهم والغلبة لك في النهاية ؟ انت بطل
انت قائد .. انت قد الأمانة وقدها وقدود كمان

مش سهل أبدا إنك تحارب شيطان خناس وسواس ليل نهار بيزن في ودنك وبيقتل ضميرك وبيحرضك علي الشر وانت تحاربه وتقاومه لا وكمان تعمل عكس اللي بيقوله تماما .. يقولك إكفر .. بيزيد إيمانك .. يقولك إسرق .. بتزيد أمانتك ..
يقولك إظلم .. بيتفوق عدلك ..
انت رائع . انت يا إنسان تستحق ان تكون خليفة الله علي الأرض فعلا .
ده انت بتعمل من الخير اللي تقدر عليه برغم انك مخلوق في كبد وده بنص ايات الله الكريمات
لَقَدْ خَلَقْنَا الْإِنسَانَ فِي كَبَدٍ (4)
ومع إقرار الله عز وجل انه سبحانه وتعالي خلقك في كبد إلا انه مطلوب منك خلق السعادة في الأرض . ده أكبر تحدي لك يا إنسان ..
وعشان كده وأكتر من كده بكتير انا ببشرك .. انت من حقك رحمة ربنا عليك اللي أكيد بتنعم بيها في دنيتك وهيكرمك بيها في الآخرة . متخافش عشان ربنا بيحبك وعالم كل العلم قدر اللي الشقاء والعناء اللي بتصادفه في حياتك .. ربنا اللي خلقك أحن عليك من نفسك .. هيجزل عليك العطاء وهيكرمك وهيفرحك في الآخرة الفرحة اللي مفرحتهاش في الدنيا .. بس انت استمر في المقاومة والتحدي وبلاش يأس وخضوع وخنوع للظروف القاسية اللي بتلاحقك .. اتحمل كمان وكمان يا إنسان .

اتحمل ظلم البشر وقسوة الظروف ومشاكل ملهاش عدد .. استحمل وسوسة الشيطان وغضب القرين واصدقاء السوء .. استحمل مغريات الحياة وعيش تحت الصفر بشرف ..

مسيرك هتفرح .. أكيد مسيرك هتفرح وترتاح ..يمكن مش هنا.. بس أكيد هناك