قاتلة نجلاء تعترف: قالت لخطيبي إني مارست الجنس مع واحد تاني

ننشر نص تحقيقات النيابة العامة في الواقعة المعروفة إعلاميا بـ شهيدة الغدر بكفر الدوار في محافظة البحيرة، والمتهمة فيها “نورهان” بقتل صديقتها “نجلاء” بمساعدة اثنين آخرين.

وقالت المهتمة “نورهان.ج.س” 23 عامًا، طالبة، أمام رجال التحقيق: “اللي حصل اني انا ونجلاء صحاب من حوالي 4 سنوات ومن السنة اللي فاتت ايام خطوبتي في شهر أغسطس بدأ أسلوب “نجلاء” يتغير معايا، وأنا بشتري الشبكة بتاعتي؛ عملت مشكلة مع أقرب صاحبه ليا، وخلتها متحضرش خطوبتي، وحتى يوم الخطوبة لما جيت أكلم صاحباتي البنات؛ قالتلي متصلش بحد، وإن محدش بيحبني، ولإنهم لو بيحبوني كانوا جم لوحدهم، ويومها اتعرفت على صاحبها محمد علي، بسببي، ورغم اني انا سبب المعرفة بينهم؛ ماكانتش بتحكيلي حاجة خالص عن صحبتهم، واتفاجأت كمان إن هي كانت بتتكلم مع خطيبي، وبتقول له إن لبسي مش محترم، واني كنت اعرف حد قبله ومارسنا جنس سوا، وكان هيسبني بسبب الكلام ده، مع انه محصلش، وكمان كنت بروحلها العيادة كتير، ولما بتكون مش فاضية؛ كنت بقعد مكنها، وعمري ما زعلتها بحاجة، وكنت تعبانه فترة كبيرة، وماكانتش بتسأل عليا، وكانت بتكلم خطيبي، وفي فترة مامتي كانت بتاخد جلسات علاج علشان كان عندها العصب السابع، وأنا مكنتش فاضية خالص، بعتتلي رسالة ومردتش عليها، وكانت بتلومني وتهزأني على الرغم إني بعتلها کارت الكشف بتاع ماما، حتي ماقالتليش ألف سلامة عليها، وهي بتلومني”.

وأضافت المتهمة: “رحت انا صالحتها في العيادة بعدها بالرغم من كده الكلام قل ما بينا وبطلت تكلمني وكرهت كل اصحابي فيا، وهي اصحابها كانو كتير قوي وكنت متغاظه منها ومش عارفه اعمل فيها ايه وفي شهر يونيو اللي فات اخدت رقم مصطفى وهو قريبي من بعيد وجارنا في البلد وكلمته وقولتله ان نجلاء سرقت مني حاجات ومبدده علي حاجات تانيه وكلامنا ده كان في كلام منه علي الواتس وكلام في التليفون وقولتله اني عايزه انتقم منها وافش غلي فيها، حتي لو هنخلص عليها، وفكرنا في كذا حاجه، ومصطفي قالي ان والده بياخد نوع دواء منوم، وبعتلي اسمه علي الوتس اب وانا كنت بعتاله علي الواتس صورة نجلاء، وراح عند العيادة مرتين علشان يتاكد من صورتها، واتفقنا اني اشتري الدوا المنوم، بس بتركيز أعلي من اللي والده بياخده وادوبه في عصير في العيادة وادهولها وانزل بيها الشارع ويكون محضر توكتوك ساعتها وناخدها بعيد نقتلها، وبعد كده روحت اشتريت الدواء فعلا وجبته بتركيز 100؛ لأن والده كان نفس الدواء بس بتركيز 20، وكان بعت لي صوره التوك توك، وخلاص كنا هننفذ، كلمني وقالي ان سواق التوك توك مرضيش، وبعدها مصطفي قالي انه هيقول لمحمد صاحبه انه يساعدنا في الموضوع، ومحمد ده قريبنا من ناحية والدتي، بس مش جارنا في البلد، وقولتله لو محمد احتاج اي فلوس علشان ينفذ معانا، انا هديله الفلوس اللي هو عايزها، بس اهم حاجه انه ميعرفش ان انا اللي في الموضوع، عشان هو قريبي من ناحية امي، واتفقنا إننا نقتلها يوم يكون الدكتور مش في العيادة فيه، وحددنا يوم الثلاثاء 3 -8 -2021 ، ان احنا هنخلص معاها، ويومها انا حضرت شوية حاجات، مقص؛ لقص أسلاك الكاميرات، وصامولة لكسرها، وموس لتهديد نجلاء، ولاصق طبي؛ علشان نكتم نفسها، والمنوم اللي كان معايا عصير”.