هند قدرى تكتب: “البخل العاطفي بيدمر العلاقات”

صعب التعامل مع الشخص بخيل المشاعر .. اللي مستني منك طول الوقت تغرقه بمشاعرك الحلوة بدون اي مقابل منه

..

مطلوب منك تقدره و تعمله خاطر و تقوله احلي كلام و تعامله احسن معاملة

و في كل كلامك و تصرفاتك تحسسه بقيمته عندك و بمكانته جواك اد ايه

..

في نفس الوقت اللي هو بيبخل فيه عليك بالكلمة الكويسة بيبخل حتي برد الفعل علي مشاعرك اللي بتقدمهاله

..

ماتفهمش هو بيفكر ازاي ولا ايه اللي في نفسيته ؟!

..

تحسه زي ما يكون خايف انك تتعود علي كده .. او متخيل ان لو بادلك مشاعره جايز تشوف نفسك بيها عليه في يوم من الايام حتى لو زعلك شايف الاعتذار هيقلل منه

كل تفكيره و مشاعره بحسابات ..ولو عليه..عايز يفضل ياخد بس

..

مع انه لو فكر شوية هيفهم ان كل متبادل مستمر علشان كده لازم عطاء المشاعر يكون متبادل علشان العلاقة تنجح وتستمر مينفعش طرف واحد يدى الحب والاهتمام والطرف الثاني مستقبل فقط

الانسان السوي اما بتقربله خطوة بيقربلك عشرة واللى بيشتريك مرة بتشتريه أنت مليون مرة

اما بتديله حقه بيديلك عينيه.. اما بتعمله خاطر بيشيلك علي راسه

..

لكن مشاعر من طرف واحد لا يمكن تستمر وتعيش

مهما طال الوقت مسيرها برضوا هتنتهي و تجف