عزت الفخراني يكتب: إبعد حبة تزيد محبة

   عزت الفخراني 

كان في مثل قديم بعتبره منهج حياة و خصوصا في الوقت الحالي اللي طغت فيه المادة على حياتنا بالكامل
( إبعد حبة تزيد محبة)
البعد هو الحل….
إبعدوا عن بعض فتره ، غيروا الناس اللي حواليكم ،
خدوا فترة راحة من بعض ،
إدي أجازة لنفسك من نفسك ومن غيرك ، ريح وأرتاح شويه
الحياة بقت صعب أوي، صعب لإن الناس نفوسها بقت ضعيفه وأخلاقها إتبدلت
التسامح قل والخلاف دب والكل حاسس بالظلم….
أمال مين الظالم؟
إيه لازمة الحياة لو عايشها في نكد وغم؟
إية المتعة في إستمرارك في مكان تحول إلى سجن وعذاب يومي لمجرد العناد والثبات على الأرض؟

ربنا حط المنهج للبشر للبحث عن الرزق والسعي والسعاده في أرضه
بسم اللّه الرحمن الرحيم
إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا ۚ فَأُولَٰئِكَ مَأْوَاهُمْ جَهَنَّمُ ۖ وَسَاءَتْ مَصِيرًا (97)

بلاش تفكر تجمع أولادك وأهلك في بيت واحد لان مشاكلهم هتزيد والمشاعر هتتبدل حتى لو تعبت في تربيتهم
لإن المتغيرات الجديده مش في إيدك ودورك في إختيار الشركاء الجدد هيبقي محدود والمشاكل مش هتقدر عليها و هترهقك و هتفرقهم قدام عينيك
فبلاش تصعب الأمور على نفسك وعلى غيرك في الوقت اللى هتكون فيه كبرت وقدرتك قلت.

هما بقت لهم حياة خاصة أهم عندهم من حاجاتك كتير إتربوا عليها وبقي في أطراف تانيه لها تأثير أكتر منك ومن اللي فات وأحياناً من إللي أتربوا عليه
سبهم يسعوا في الأرض
ويبعدوا حبه عشان يزيدوا محبة