صدمة للدولار فى السوق السوداء.. مفيش بيع ولا شراء
من امبارح وفيه حالة من حالات الركود بتضرب السوق السودا للدولار وتقدر كده تقول ان لا فيه بيع ولا فيه شرا يعني بالبلدي كده اللي معاهم دولار مش عاوزين يفرطوا فيه واللى بيشتروا موقفين شرا.. طب يا ترى ده سببه ايه ؟ وهل ده معناه ان الدولار في السوق الموازية سعره هينزل الفترة الجاية؟
الدولار في السوق السوداء
فى آخر كام يوم فيه حاجة غريبة بتحصل فى السوق الموازية للعملة وطبعا زي ما كلنا عارفين فيه تراجع كبير حصل فى سعر الدولار وبعد ما كان وصل الى 42 جنيه رجع تاني يتم تداوله في مستويات من 38 الى 40 جنيه لكن حتى مع الاسعار الجديدة دي تقريبا حركة البيع والشرا واقفة تماما ومفيش تنفيذ لأي عمليات خالص
الغريبة ان الوقت ده كل سنة ومع نهاية السنة المالية وعودة المصريين من الخارج كان بيشهد انخفاض كبير فى سعر العملة الامريكية مع نزول المصريين فى الخارج اجزات فى الوقت ده .
شلل تام في السوق السوداء
وواضح كده ان المضاربين بيحاولوا يعطشوا السوق عشان يفضل سعر الدولار عالى رغم ان فيه كام حاجة حصلت بتقول ان سعر العملة الأمريكية بيميل الى الهبوط او على اقل تقدير الاستقرار.
زي مثلا الكام صفقة اللى تموا مع السعودية فى مجال السيارات وعدد من الصناعات المعدنية وتصريح وزير الصناعة السعودي بوجود انفراجة فى أزمة نقص العملة الأجنبية وتذليل كافة العقبات امام المستثمرين السعوديين فى مصر وكمان الاتفاق الضخم اللى عملته مصر امبارح مع الامارات واللى بموجبه هيتم استثمار حوالى 11 مليار دولار فى مشروعات انتاج طاقة كهربائية
ده كمان صفقات بيع أذون الخزانة اللى نفذها البنك المركزي وباع من خلالها أذون بأكتر من نص مليار دولار .. وبيع أدوات دين حكومية فى الوقت ده معناه ثقة من المستثمرين فى الاقتصاد المصري وفى قدرة مصر على الوفاء بالتزماتها.
