رجب الشرنوبي.. يكتب: عالم التيييت تيت .. كلب الست!!
المحامية الشهيرة نهاد أو القمصان خلت ناس كتير اليومين اللي فاتوا دول، تفكر تدلدل السلسة من رقبتها وتمشي تمخطر نفسها في الشارع!! يمكن حد يقابلها من بتوع حقوق ورعاية الحيوان دول يحن عليها ويأخدها!!، يرحمها كن الذل ويبغددها بدل ما تفكر في الإنتحار وتروح النار، كله منك يامايلو يا ابن المحظوظة (ياكلب الست) عايش عيشه أحسن من نص الشعب!!
فعلاً اللي إختشوا ماتوا، صحيح كانوا عايزين يستروا نفسهم بس في النهاية بردو ماتوا!!
🔳الأيام دي وقبل حركة المحافظين هتشوفوهم طول النهار والليل في الشوارع، ترميم وتكسير ورصف وتخليع لمبات ودهان عمدان وحاجات كتير تانية، المهم المعدات مش هتهمد وطبعاً الإعلام والكاميرات أول الحضور!!، كله كوم وموضوع تخفيض الإنارة ده كوم تاني، متستغربوش لو لقيتوا المحافظ واقفلكم علي الباب، يوصيكم تخفضوا سرعة المروحة شويه!!
🔳ياريت رئيس الوزراء يأجل الحركة دي شوية قد ست شهور كده ولاحاجة، يمكن نستفيد منهم شوية قبل ما يمشوا جزء من تمن اللي خدوه واللي لسه ياخدوه!!!
🔳دكتور طارق شوقي إحنا لو كنا فيران تجارب أكيد كنا هنصعب عليك ومكنتش هتجرب فينا السنين دي كلها، أقل حاجه تُخت وكراسي الأولاد في المدارس سوسِت من كتر الركنه، إعلانات الدروس منورة الشوارع زيها زي عيادات الدكاترة ومكاتب المحامين!!
🔳منه لله سيد العراقي واللي زيه شكلهم همه السبب أنا بقول تتوضي وتصلي ركعتين وتدعي عليهم!! كله كوم وحكاية التجربة المصرية الرائدة في التعليم دي كوم تاني خالص، ملهاش حل تاني ياحضرتك كنت غلط وتعترف ياتلات تربع الشعب ده كان غلط وبردو يعترف، أو نرفع سوا قضية علي التابلت يمكن هو السبب في سوء التفاهم اللي حصل بينا، بصراحه بيفكرني بصفقة اللوحات المعدنية أيام أحمد نظيف!!.
🔳دكتورة نيفين الكيلاني: الوزيرة اللي قبلك كل نشاطها كان أوبرالي وحضرتك كمان إشتغلتي في الأوبرا قبل كده وكأن الشعب المصري ده مولود في روما، طيب دي كل العربيات والتكاتك مشغله أغاني مهرجانات ولو جيبنا سيرة الأوبرا يمكن نتحدف بالطوب!!.
🔳الناس محتاجة قصور الثقافة ترجع تشتغل وتتهوي من جديد بدل العنكبوت اللي عشش فيها!! يمكن نلحق ننقذ كام ولد وكام بنت قبل الأجيال دي متروح بلا رجعه!! تمنياتي لكي بالتوفيق في عملك الجديد بس ياريت تبعدي إلهام شاهين عن أي تكريمات جايه.
الأيام دي ماشيه معاها كدة ووقفتها قدام الكاميرا فيها شويه ثقه علي حبة غرور وخلي بالك عدت الستين هتفضي قريب ومعدش وراها حاجه وهيا بصراحة واجهه.
🔳وزير الأوقاف شكله كده علاقاته قوية بالمجموعة الإقتصادية..بيني وبينكم فيه شبه كده من بتوع العقارات بيفكرني بأشرف السعد، كمان باين عليه غاوي سياسيه من أيام إبتدائي!! حتي في مولد النبي بردو بيتكلم في السياسة!! الظاهر إنه مطول معانا شوية.
